हातवारे करीत पैसे मागणे लाचखोरीचा पुरावा नाही | Session Court

Last updated on August 1st, 2025 at 09:46 pm

हातवारे करीत पैसे मागणे, हा लाचखोरीचा पुरावा नाही.

• सत्र न्यायालयाचा महत्त्वपूर्ण निर्वाळा
• एफडीए अधिकारी महिला १० वर्षांनंतर निर्दोष

मुंबई – पैसे मागण्यासाठी ‘हातवारे’ करणे (इशारा करणे) हा लाचखोरीचा पुरावा ठरू शकत नाही. हातवारे करण्यावरुन लाचेची मागणी सिद्ध होत नाही, असा महत्वपूर्ण निर्वाळा सत्र न्यायालयाने दिला आहे. एफडीएमध्ये कार्यरत सरला खटावकर या अधिकारी महिलेने २ लाखांची लाच मागितल्याचा आरोप होता. मात्र याचा सबळ पुरावा नसल्याचे मत नोंदवत न्यायालयाने तिची निर्दोष सुटका केली.

विशेष सत्र न्यायाधीश ‘निखिल मेहता’ यांनी हा निर्णय दिला. नगर येथील डेअरीमधील दूध जप्त करण्यात आले आणि नंतर पुढील कारवाईची धमकी देऊन २ लाख रुपयांची लाच मागितल्याचा आरोप होता. फेब्रुवारी २०१३ मध्ये हा प्रकार घडला होता. याप्रकरणी नगरच्या पारनेर तालुक्यातील किसान कावड यांनी तक्रार दिली होती. त्या तक्रारीच्या आधारे ११ मार्च २०१४ रोजी गुन्हा दाखल करून लाचलुचपत प्रतिबंधक विभागाने (एसीबी) चेंबूर येथील हॉटेलमध्ये सापळा रचला होता आणि २ लाख रुपयांची लाच मागताना सरला खटावकरला रंगेहाथ पकडले होते. मात्र लाचखोरीचा सबळ पुरावा सादर करण्यात सरकारी पक्ष अपयशी ठरला, असे निरीक्षण नोंदवत न्यायालयाने आरोपी सरला खटावकरची दहा वर्षांनंतर निर्दोष मुक्तता केली.

• एसीबीच्या अधिकाऱ्यांनी सापळा रचून केलेल्या कारवाईचा संदर्भ या खटल्यात दिला. मात्र या कारवाईदरम्यान आरोपी अधिकारी महिलेने लाच मागितल्याचे सिद्ध होत नाही.

• आरोपीने कथित पैसे मागताना केवळ हातवारे केले आहेत. अशाप्रकारे हातवारे करुन केलेली पैशांची मागणी हा लाच मागितल्याचा पुरावा ठरू शकत नाही.

• केवळ लाचेच्या रक्कमेची वसुली हासुद्धा लाच स्वीकारल्याच्या आरोपाचा पुरावा ठरणार नाही. रक्कम वसुलीच्या आधारे आरोपीचा गुन्ह्यातील सहभाग सिद्ध होत नाही.