मुलाला भेटण्याचा जन्मदात्याचा हक्क नाकारू शकत नाही! हायकोर्टाचा महत्वपूर्ण निर्वाळा | High Court
Last updated on August 1st, 2025 at 09:45 pm
आईची याचिका फेटाळली !!
मुंबई – मुलाला भेटण्याचा जन्मदात्याचा हक्क नाकारू शकत नाही. मुलाच्या योग्य संगोपनासाठी मुलाला मातेबरोबरच पित्याचेही प्रेम मिळणे गरजेचे आहे, असा महत्वपूर्ण निर्वाळा उच्च न्यायालयाने दिला. पिता दर महिन्याच्या पहिल्या रविवारी चार तास मुलाला भेटू शकतो, या कनिष्ठ न्यायालयाच्या निर्णयाला मुलाच्या आईने आव्हान दिले होते. तथापि, न्यायमूर्ती शर्मिला देशमुख यांच्या एकलपीठाने आईची याचिका फेटाळली.
पतीने मला गरोदर असताना सासरच्या घरातून बाहेर काढले. मुलाच्या प्रसूतीचा सर्व खर्च माझ्या आई-वडिलांनी केला. मुलाचा जन्म झाल्यापासून पुढील सहा वर्षांत पतीने एकदाही मुलाची किंवा माझी भेट घेतली नाही. मुलाच्या देखभालीसाठी कुठला खर्च केला नाही. अशा स्थितीत पतीला मुलाची भेट घेण्यास मुभा दिली, तर मुलावर परिणाम होईल, असा दावा ज्योती साळवी (नाव बदललेले) हिने याचिकेतून केला. हा दावा न्यायालयाने अमान्य केला. केवळ पिता मुलाला त्याच्या जन्मापासून एकदाही भेटला नाही म्हणून पित्याला मुलाची भेट घेण्यापासून वंचित ठेवता येणार नाही. आई राहत असलेल्या ठिकाणी मुलाला भेटण्यास पित्याला सशर्त परवानगी देण्यात आली आहे. कनिष्ठ न्यायालयाचा हा निर्णय योग्यच आहे, असे न्यायमूर्ती देशमुख यांनी स्पष्ट केले.
“देखभाल खर्चासाठी स्वतंत्र अर्ज करा”
मुलाच्या देखभालीसाठी पती काहीच खर्च करीत नसेल, तर त्यासाठी कनिष्ठ न्यायालयाकडे स्वतंत्रपणे अर्ज करण्यास याचिकाकर्तीला मुभा राहील. मात्र त्याआधारे मुलाची जन्मदात्यापासून ताटातूट केली जाऊ शकत नाही, असेही निरीक्षण उच्च न्यायालयाने नोंदवले.
